Hazrat Sayyed Akmal Husain rahmatullāhi alaihi :
♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦
Alqaab :
‾‾‾‾‾‾‾‾‾‾
Baaba Maan, Shehanshaah e Baroda.
****************
Aap Yemen ke shehzaade the. Magar aap mahel me aish o
aaraam karne ke bajaay jangal me jaakar ibaadat karna
zyada pasand karte the.
Aakhir me aap sab kuchh chhodkar Yemen se Hindustan
tashreef laaye. Aap ne Gujarat ke Panchmahal me
Pavagadh ke qareeb qayaam farmaaya.
Aap ne dekha ke Pavagadh ke pahaad par se kuchh log
neeche aate hain aur zaroorat ka saamaan kharidkar
waapas pahaad par chale jaate hain. Aap ne ek shakhs se
puchha ke ‘Aap log kaun hain aur kaha par rehte hain?’ Us
ne bataaya ke ‘Main Hazrat Sadan Shaah Sarmast ka
mureed hu jo Hazrat Sayyed Badi-ud-deen Madaar Shaah
ke khalifa hain. Hamare Peer pahaad ke upar rehte hain.
Hum khaane ki aur dusri zaroorat ki cheezen lene ke liye
aate hain.’
Aap un ke saath Pavagadh ke pahaad par gaye. Hazrat
Sadan Shaah Sarmast ki baargaah me pahunchkar aap ne
mureed hone ke arz kiya. Hazrat ne apne mureedo ke saath
rehkar un ko kaam me madad karne ke liye farmaaya.
Kuchh waqt ke baad Hazrat ne aap ko mureed banaaya.
Aur aap ko Peer ke liye khaana pahunchane ki zimmedaari
di gai. Aap roz peer ke liye khaana le jaate. Peer us me
kuchh khaate aur baaqi aap ko khaane ke liye dete. Aap us
khaane ko khaane ke bajaay ek ghaar me le jaakar ek kone
me rakh dete jaha par aap ibaadat kiya karte the.
Ek martaba Peer ne aap se farmaaya ‘Main chaahta hu ke jo
log pahaad ke aas-paas rehte hain un sab ko hum khaane
ki daawat karen.’ Peer ke farmaan par aap ne sab logo ko
daawat ki. Magar jis din sab logo ko daawat thi us din
khaane ka koi intazaam nahi kiya gaya. Ye dekhkar aap ke
saathiyo ne aap se puchha ‘Aap ne logo ke liye khaane ki
koi tayyaari ki hai ya nahi?’ Aap ne farmaaya ‘Maine sab
intazaam kar liya hai.’ Aakhir me jab Peer ne farmaaya
‘Akmal Husain, Khaana haazir karo.’ Aap us ghaar me gaye
aur jo bacha hua khaana jama kiya tha aur us ke upar ek
kapda rakha tha. Aap ne namaaz padhi aur phir ALLĀH
ta’ala se dua ki ‘Aye behtareen ata farmaane waale, Maine
khaane ki koi tayyari nahi ki hai. Magar teri zaat par
yaqeen hai. Tere karam se is mauqe par meri laaj rakh le.’
Is ke baad aap us kapde ko hataaye baghair us ke andar
haath daalkar taaza khaana thaali me rakhkar dete gaye
yaha tak ke sab ne khaana khaa liya.
Is ke baad Peer ne aap ko bulaaya aur khilaafat ata farmai.
Is ke baad aap Pavagadh se Vadodara tashreef laaye aur
isha’at e Islaam karte rahe aur logo ko faiz ata farmaate
rahe.
****************
Aap Hazrat Sadan Shaah Sarmast rahmatullāhi alaihi ke
mureed aur khalifa hain aur ‘Madaari silsila ke Shaikh hain.
****************
Aap ka wisaal 8 Sha’abaan ko hua.
Aap ka mazaar Vadodara (Gujarat) me hai.
****************
Aap ke mazaar par ek sunehari kalash hai. Jis me har saal
urs ke mauqe par doodh bhara jaata hai aur agle saal jab
kalash ko utaara jaata hai to us me wo doodh wais hi taaza
hota hai.
****************
ALLĀH ta’ala us ke Habeeb sallallāhu alaihi wa sallam ke
sadqe me
Aur Hazrat Sayyed Akmal Husain rahmatullāhi alaihi aur
tamaam Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke
Eimaan ki hifaazat farmae aur Sab ko nek amal karne ki
taufiq ata farmae.
Aur Sab ko dunya wa aakhirat me kaamyaabi ata farmae
aur Sab ki nek jaa'iz muraado ko puri farmae.
Aameen. —