awaliyaALLAH POST

Hazrat Shaikh Abul Qaasim Junaid al-Baghdadi
rahmatullāhi alaihi :
♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦
Alqaab :
‾‾‾‾‾‾‾‾
Sultan-e-Tareeqat, Sayyed-ut-Taa'ifa, Shaikh alal-Itlaaq,
Qutb-ul-Istihqaaq, Ta'oosul Ulema, Mamba-e-Israar.
****************
Aap ki wilaadat 218 Hijri (830 A.D.) Baghdad me hui.
Aap ke waalid ka naaam Muhammad bin Junaid al-
Khazzaaz al-Nehawandi hai.
Aap ke waalid Zajjaj ya’ni sheesha (aa'ina) bechne wale
the.
****************
7 saal ki umr me aap Hazrat Sirri al-Saqati rahmatullāhi
alaihi ke saath Haram shareef gaye tab 400 ulema jama
hokar Shukr ke mauzu par guftago kar rahe the. Har aalim
ne baari baari apni baat batai. Aakhir me Hazrat Sirri al-
Saqati ne aap ki taraf dekhkar farmaaya ‘Junaid, tum bhi is
ke bare me kuchh batao.’ Aap ne kuchh lamho ke liye nazar
jhuka li. Phir farmaaya ‘Shukr ye hai ke tum ALLĀH ta’ala ki
ata ki hui kisi bhi ne'amat ke zariye us ki na-farmaani na
karo aur na hi un ne'amato ko ALLĀH ki na-farmaani me ya
kisi ko takleef dene me istemaal karo.’
Ye sunkar waha maujood tamaam ulema kehne lage ‘Aye
hamari aankho ki thandak, Tum ne job hi kaha wo sab sach
hai aur tum apne alfaaz me imaandaar ho. Hum is ke baare
me behtar nhi keh sakte jo tum ne kaha hai.’
Hazrat Sirri al-Saqati ne aap se puchha ‘Beta, Aise achhi
baat tum ne kaha se sikhi?’ Aap ne farmaaya ‘Ye sab maine
aap ki sohbat ke faiz se sikha hai.’
****************
Aap ne Hazrat Abu Ali Soori rahmatullāhi alaihi se Fiqh ki
taalim haasil ki, jo Imaam Shafi’i ke shaagird the aur 20
saal ki umr me Fatwa dena shuru kiya.
Aap ne Hazrat Shaikh Sirri al-Saqati rahmatullāhi alaihi se
Tasawwuf ki taalim haasil ki.
****************
Apni jawaani me aap kushti kiya karte the aur baadshaah
ke khaas pehalwaan me se ek the.
Shaher e Baghdad me ek aale rasool saadaat rehte the. Un
ke haalaat aise the ke khaane aur pehanne ke liye bhi
saamaan nahi tha. Wo baadshaah ke paas aaye aur un se
kaha ke ‘Main aap ke pehlwaan se kushti ladna chaahta
hu.’ Baadshaah ne socha ke Ye shakhs dubla patla hai
kaise kushti ladega. Lekin jab sayyedzaade ne zor dekar
kaha ke ‘Main aap ke sab se ache pehlwaan se kushti ladna
chahta hu.’ Tab baadhshaah ne Hazrate Junaid ko bulaaya
aur in se kushti ladne ke kaha.
Baghdad shaher ke saare log kushti dekhne ke liye jama ho
gaye. Jab pehlwaan Junaid aur Sayyedzaada dono maidaan
me aa gaye tab Sayyedzade ne Juned ko dhire se kaha ke
‘Main aale rasool hu aur bahot ghareeb hu aur mere
gharwale bahot takleef me hain. Agar aaj aap mujhe kushti
me jitne de to mumkin hai ke baadshaah mujhe kuchh
in’aam de jis se main apna guzraan kar saku.’
Jab dono ke bich kushti shuru hui to thodi hi der me
sayyedzaade ne Junaid ko pachhad diya. Sab log hairaan
hue. Phir se kushti shuru hui to phir se us hazrat ne Junaid
ko pachhad diya aur teesri baar bhi aisa hi hua.
Baadshaah ne sayyedzaade ko in’aam me bahot maal diya
aur wo khush hokar apne ghar aaye.
Us raat Hazrat Junaid ke qismat jaagi aur Khwaab me
Huzoor Rehmate aalam pyare aaqa sallallāhu alaihi wa
sallam tashreef laaye aur farmaaya ke ‘Aye Junaid tum ne
meri aal ki madad ki hai aur main tum se bahot khush hu
aur Rab ta’ala ne tumhe wilaayat ata farmai hai.’
Jab aankh khuli to aap baadshaah ke pasa gaye aur sab
qissa sunaakar us ki ijaazat lekar waha se nikal gaye aur
puri zindagi ALLĀH aur us ke Rasool sallallāhu alaihi wa
sallam ki ita’at me guzaari.
Is ke baad aap ne apne waalid ka sheeshe (aaina) ka
kaarobaar karna shuru kiya. Aap roz apni dukaan me aakar
kaarobaar shuru karne se pehle 400 rak’at nafl namaaz
padhte.
****************
Kuchh saal baad aap ne apna kaarobaar chhod diya. Aur
apne peer Hazrat Saarri al-Saqati rahmatullāhi alaihi ke
makaan me ek kamre me rehne lage. Aap zyada waqt Peer
ki khidmat me aur ibaadat, zikr aur muraaqaba me
guzaarte.
Aap Taqwa aur Ibaadat me bemisaal the.
Aap hamesha Sunnat e Rasool par amal karte aur shariat ki
paabandi karte.
Puri raat aap ibaadat e ilāhi me guzaarte. 30 saal tak aap
ne isha’ ke wuzu se fajr ki namaaz ada ki.
20 saal tak aap namaaz me Takbeer e ula ke saath saamil
hua.
Agar namaaz me aap ko dunya ki isi cheez ka khayaal aata
to aap namaaz ko dohra lete. Agar namaaz me Jannat ka
khayaal aata to aap sajda e sahaw karte.
Aap aksar roza rakha karte the.
****************
Ek baar ek majoosi andar zanaar (dhaaga) pehankar aur
upar islaami kurta pehankar aap ke paas aaya aur kaha
‘Huzoor , main aap ke paas is hadees ka mafhoom jaanne
ke liye aaya hu - Itaqu bi firaasatil mo’min fa innahu
yanzuroo bi Noorillaahi (ya’ni Kaamil Mo’min ki firaasat se
daro beshak wo ALLĀH ke noor se dekhta hai.)’ Aap ne
farmaaya is ka matlab ye hai ke ‘Tum zanaar nikaal do aur
kufr ko chhodkar Islaam ko apna lo.
Ye sunkar majoosi ko ta’ajjub hua aur wo foran kallima
padhkar musalman ho gaya.
****************
Aap ke bahot saare mureedo me ek mureed aap ka khaas
aur pasandeeda tha. Dusre mureedo ne is par aitraaz kiya.
Aap ne farmaaya ke ‘Wo tum sab me zyada ilm waala aur
daana hai. Is liye main us par khaas tawajjoh deta hu.’ Phir
aap ne farmaaya ‘Main is baat ka saboot paish karta hu.’
Aap ne sab ko ek ek murgi aur chhoori dekar farmaaya ‘Ise
aisi jagah le jaakar zubah karo jaha par koi dekh na raha
ho.’ Sab mureed tanhai me jaakar murgi ko zubah karke
aaye. Aakhir me wo mureed zinda murgi ko lekar waapas
aaya. Aap ne us se puchha ‘Tum ne murgi ko zubah kyun
nahi kiya?’ Us ne arz kiya ‘Huzoor, Main jaha bhi bhi gaya
maine ALLĀH ki qudrat ko maujood paaya aur main jaanta
hu ke wo kaainaat ki har cheez ko dekh raha hai. Is liye
mere paas koi raasta nahi the aur main ise zubah nahi kar
saka.’ Aap ne tamaam mureedo se farmaaya ‘Aap sab ne is
ka jawaab sun liya. Yehi wajah hai ke ye mera khaas aur
pasandeeda hai.’
****************
Aap ne ‘Fana fillāh’ ki haqeeqat samjhai.
****************
Aqwaal :
‾‾‾‾‾‾‾‾
Aap farmaate hain
(1) Qalb ko dunyaawi khwaahishaat se paak saaf karne ka
naam hi Tasawwuf hai. Aur ALLĀH ki mohabbat me
hamesha nafs ki khwaahishaat ko mukhaalifat karna Fana
fillāh hai. Ye Zohad se shuru hokar Ibaadat aur Zikr ki
kasrat, aur Ikhlaas ke zariye Muraqaba par mukammal hota
hai.’
(2) Nafs ki taabedaari barbaadi ki bunyaad hai.
(3) Jo aankh ALLĀH ta’ala ki qudrat wa khalqat ka
nazaazra dekhkar naseehat haasil na kare us se na-bina
hona behtar hai;
Jis kaan ko haq baat sunne ki aadat nahi us se behra hona
behtar hai;
Jis zabaan ko zikr e ilaahi ki aadat nahi us se gunga hona
behtar hai;
Aur jis jism ALLĀH ki ibaadat karne ki aadaat nahi us se
maut aa jaana behtar hai.
(4) Jo apne Qalb ki hifaazat karta hai us ne Deen ki hifaazat
ki.
(5) Dunya ko tark karne se aur khalwat apnaane se Eimaan
mehfooz rehta hai, badan tandurast rehta hai aur dil khush
rehta hai.
****************
Aap Hazrat Shaikh Sirri al-Saqati rahmatullāhi alaihi ke
mureed aur khalifa hain.
Aap ka silsila e tareeqat ‘Junaidi’ kehlaata hai.
Aap ke khulfa :
(1) Hazrat Shaikh Abu Bakr Shibli rahmatullāhi alaihi;
(2) Hazrat Shaikh Abu Ali Rudbari rahmatullāhi alaihi;
(3) Hazrat Shaikh Mansoor Abraar rahmatullāhi alaihi;
(4) Hazrat Shaah Muhammad bin Aswad Dinwari
rahmatullāhi alaihi;
(5) Hazrat Shaah Ismāeel-al-Azeez rahmatullāhi alaihi.
****************
Jab aap ka wisaal ka waqt qareeb tha tab aap ne apne
shaagirdo ko wuzu karaane ke liye farmaaya. Wuzu
karaane me wo log daadhi me khilaal karaana bhul gaye to
aap ne unhe yaad karaaya. Phir aap sajde me gaye aur rone
lage. Logo ne aap se arz kiya ‘Aap to ibaadat guzaar hain
phir aap itna kyun ro rahe hain?’ Aap ne farmaaya ‘Junaid
ko is se zyada is ki zaroorat kabhi nahi paish aai.’ Phir aap
ne tilaawat e Qur’an shuru kiya. Logo ne aap se puchha
‘Hazrat aap ne Qur’an majeed ki tilaawat kyun shuru ki?’
Aap ne farmaaya ‘Is ke baad mera naam e aamaal band
hone wala hai. Main dekh raha hu ke mera aamaal naama
ek baarik dhaage me baandhkar latkaaya gaya hai aur
hawa chal rahi hai. Main nahi jaanta ke ye hawa wisaal ki
hai ya maghfirat ki hai. Main apni ek jaanib malik ul maut
ko dekh raha hu aur ek jaanib pul siraat ko dekh raha hu.’
Aap ne pura Qur’an majeed mukammal karne ke baad
Surah Baqarah ki 70 aayaten tilawaat ki.
Is ke baad aap ne apni ungliyo par tasbeeh padhna shuru
kiya. Jab aap Shahaadat ki ungli par pahunche tab aap ne
ungli ko aasmaan ki taraf uthaaya aur ‘Bismillāhir
Rahmānir Raheem’ padha aur phir apni aankhen band kar
li. Aur aap ka inteqaal ho gaya.
****************
Aap ka wisaal 27 Rajab 298 Hijri (910 A.D.) ko Jum’aa ke
roz hua.
Aap ka mazaar Shaunizia, Baghdad (Iraq) me hai.
****************
ALLĀH ta’ala us ke Habeeb sallallāhu alaihi wa sallam ke
sadqe me
Aur Hazrat Shaikh Junaid al-Baghdadi rahmatullāhi alaihi
aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke
Eimaan ki hifaazat farmae aur Sab ko nek amal karne ki
taufiq ata farmae.
Aur Sab ko dunya wa aakhirat me kaamyaabi ata farmae
aur Sab ki nek jaa'iz muraado ko puri farmae.
Aameen.

Join whatsapp group :-9096751100