Hazrat Shaikh Sayyed Imaad-ud-deen Abu Saaleh Abdullāh
Nasr Qaadri al-Jeelaani rahmatullāhi alaihi :
♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦
♦ ♦ ♦ ♦ ♦ ♦
Aap ki wilaadat 24 Rabi’ ul Awwal 562 Hijri (January 1187
A.D.) ko Baghdad me hui.
Aap ke waalid ka naam Hazrat Sayyed Taaj-ud-deen Abdul
Razzaaq bin Sayyed Muhiy-ud-deen Abdul Qaadir Jeelaani
rahmatullāhi alaihi aur waalida ka naam Bibi Taaj un nisa
Ummul Karam hai.
Aap Hasani saadaat hain.
Aap ki waalida Aalima aur muttaqi thi.
*****************
Aap ne apne waalid e mohtaram Hazrat Sayyed Taaj-ud-
deen Abdul Razzaaq Qaadri aur deegar masha'ikh se taalim
haasil ki.
Aap ne kuchh arse tak apne chacha Hazrat Shaikh Sayyed
Saif-ud-deen Abdul Wahhaab ki khidmat me rehkar bhi faiz
haasil kiya.
Aap Qur’an, Hadees aur Fiqh ke maahir the.
Aap apne daada Huzoor Ghaus-e-aazam radiy-Allāhu
anhu ke Madrasa ke mutawali the.
*****************
Aap bahot umda muqarrir the.
Aap Aarif, Muhaqeeq aur baahis (debater) the.
Aap hamesha shariat par amal karte the aur logo ko bhi is
ki taalim dete the.
Aap khilaaf e shariat koi baat bardaasht nahi karte the.
8 Zil Qa’adah 622 Hijri (November 1225 A.D.) ko aap ko
Qaazi-ul-Quzzat (Chief Justice) banaaya gaya.
Ek martaba aap Wazeer ke ghar par ulema ki mehfil me
tashreef farma the. Itne me ek shakhs umda libaas waala
aaya. Sab log us ki ta’azeem ke liye khade hue. Aap us
shakhs ko pehchaante nahi the is liye Aap bhi khade hue.
Phir aap ne kisi se puchha to pata chala ke wo Ibn Karam
naami yahudi hai aur use ek ilaake ka govener banaaya
gaya hai. Aur logo me us ka bada ru-aab hai. Aap ko ye
baat ghair munaasib lagi ke Islaami hukoomat me ek
yahudi ghair muslim ko governer ka ohada dekar itni izzat
di jaaye.
Jab sab log waha se chale gaye us ke baad wo aap ke paas
aakar baitha to aap ne foran use waha se khade hokar door
chale jaane ke liye farmaaya. Wo khaamoshi se waha se
khada hua aur chala gaya.
Us ke chand din baad aap Daar ul khilaafat se milne waali
tankhwaah lene ke liye jaa rahe the tab pehle aap Hazrat
Imaam Ahmad bin Hanbal ke mazaar par gaye. Aur phir jab
tankhwaah lene ke liye gaye to sab ko tankhwaah di gai
magar aap se kaha gaya ke ‘Aap ko Ibn Karam se
tankhwaah leni hai.’ Aap Ibn Karam ke paas jaane ke
bajaay aap apne ghar waapas aa gaye aur khud se kaha
‘Aye nafs! Humare deen ke siwa koi behtar deen nahi. Agar
tum in sab pareshaani se aazaad hona chaahte ho to is
dunya ko chhod do. Humare liye minaasib nahi ke hum kisi
mushrik ke paas jaayen. Agar hum shariat ke paaband
rahenge to humara Rab humari zaroorat zaroor ko pura
karega.’
Is tarah aap ne jab tak wo mushrik yahudi zinda tha us ke
paas jaakar tankhwaah lena chhod diya aur jab wo yahudi
mar gaya us ke baad hi apni tankhwaah lene ke liye gaye.
*****************
Aap hamesha saadgi pasand farmaate the.
Aap apne husn e akhlaaq aur narmi ke liye mash'hoor the.
*****************
Aap ke 5 saahabzaade hain :
(1) Sayyed Mohiy-ud-deen Abu Nasr Muhammad
(2) Sayyed Zaheer-ud-deen Abu Mas'ood Ahmad
(3) Sayyed Shahaab-ud-deen
(4) Sayyed Ali
(5) Sayyed Yaseen.
*****************
Aap Hazrat Shaikh Sayyed Taaj-ud-deen Abdul Razzaaq
Qaadri al-Jeelaani rahmatullāhi alaihi ke mureed aur
khalifa hain.
Aap ke khalifa :
Sayyed Mohiy-ud-deen Abu Nasr Muhammad rahmatullāhi
alaihi.
*****************
Aap ka wisaal 27 Rajab 632 Hijri (April 1235 A.D.) ko hua.
Aap ka mazaar Baghdad (Iraq) me hai.
****************
ALLĀH ta’ala us ke Habeeb sallallāhu alaihi wa sallam ke
sadqe me
Aur Hazrat Shaikh Sayyed Imaad-ud-deen Abu Saaleh
Abdullāh Nasr Qaadri al-Jeelaani rahmatullāhi alaihi Qaadri
al-Jeelaani rahmatullāhi alaihi aur tamaam Auliya Allāh aur
Ahle bait ke waseele se
Sab ko mukammal ishq e Rasool ata farmae aur Sab ke
Eimaan ki hifaazat farmae aur Sab ko nek amal karne ki
taufiq ata farmae.
Aur Sab ko dunya wa aakhirat me kaamyaabi ata farmae
aur Sab ki nek jaa'iz muraado ko puri farmae.
Aameen.


Join whatsapp group :-9096751100